“Ma's wat omgee"
Die “Ma’s wat omgee” is ‘n groepie vrywillige Ma’s wat weekliks by die twee skole voorbidding doen vir die leerders en personeel. Indien daar enige Ma’s is wat belangstel om by hierdie spesiale gebedsgroepie aan te sluit kan u gerus vir Petra Pieters, die Bemarker kontak.
Ouervereniging
Die Ouervereniging onder voorsitterskap van mev. Corné Blomerus verseker goeie skakeling en kommunikasie tussen ouerhuis en skool en pak deur die jaar verskeie projekte aan. Hulle het verlede jaar met groot sukses die Glam Gura-aand en Juanita du Plessis aangebied. Indien u as ouer enigsins betrokke wil raak, is u welkom om mev. Blomerus by 083 508 3356 te kontak.
Oueraande
Daar word elke kwartaal op die eerste Dinsdag nadat die assesseringsverslae uitgestuur is, ‘n oueraand gehou. Ons is dankbaar dat die personeel ook op die manier ons ouers en leerders van diens kan wees. Ons doen tog ‘n beroep op alle ouers om hierdie kosbare tydjie af te staan, om ons kinders se belange wat ons almal na aan die hart lê, met vrymoedigheid te kom bespreek.
Ondersteunersklub
Die Ondersteunersklub is ‘n organisasie wat al die afgelope 15 jaar bestaan. Die doel van die Klub is om die Sport Aktiwiteite van die Parys Hoërskool en Laerskool H F Verwoerd in die algemeen te bevorder d.m.v finansiële bystand.
Die skool en ouers het groot waardering vir hierdie diens en ondersteuning wat aan ons leerders gelewer word. Daar word 'n beroep op ouers en sakemanne gedoen om by die Ondersteunersklub aan te sluit of betrokke te raak om sodoende die Ondersteunersklub verder uit te bou in belang van ons leerders.
Die kontakpersoon is Bets Heydenrych sel: 0722196612
VRL
Die Verteenwoordigende Raad van Leerders (VRL) bestaan uit twee lede uit elke klas, ‘n dagbestuur, bestaande uit ‘n president, twee visepresidente, sekretaris, tesourier en twee addisionele lede, waarvan die president en visepresidente ook as verkose lede op die Leerderaangeleenthede komitee van die Beheerliggaam dien.
‘n Suksesvolle opleidingskamp word jaarliks gedurende Februariemaand vir hierdie verkose leerders aangebied waartydens hulle in alle fasette van hul verantwoordelikhede geskool word. Daar word ook tyd ingeruim vir ontspanning en spanbou op die rivier.
Daar word van die VRL verwag om diensdoenend te wees tydens skoolure en skoolaktiwiteite. Daar is tydens ‘n behoeftebepaling in die verlede gevind dat meer senior leerlinge benodig word om dienspunte te beman. Hierdie groep graad 12-leerlinge funksioneer onder die vaandel van die leerlingaangeleenthede subkomitee van die VRL en is baie suksesvol met die uitvoering van hul take.
VRL-vergaderings vind op ‘n tweeweeklikse basis plaas. Kwartaallikse graad- en klasvergaderings word ook deur die VRL behartig. Sosiale aktiwiteite soos bv. die Afrika-dagvieringe word met groot sukses deur die VRL beplan en uitgevoer.
Die VRL is jaarliks betrokke by die bemarking en uitstallings tydens die graad 7-inligtingsaand waar hulle in samewerling met die aktiwiteitshoofde en die bemarker verantwoordelik is vir ʼn uitstekende bemarkingsaksie.
Leiersberaad - 2009
Tien leerlinge uit graad 11 het verlede jaar se leiersberaad in Bloemfontein bygewoon - vergesel deur mev. Bertha van Zyl. Die terugvoering wat ontvang is, bevestig dat ons leerlinge hulle altyd uitstekend van hulle ambassadeurskap kwyt.
Beeld Jeugberaad - 2009
Jaarliks doen leerders aansoek om vir die Beeld Jeugberaad uitgenooi te word. Keuring geskied op grond van veskeie prestasies. Verlede jaar het ons twee suksesvolle kandidate gehad nl. Santana Pestana en Alfred Smit. Baie geluk, ons is trots op julle.
|